Implantación do cultivo de millo en faixas: un sistema de mínimo laboreo que acurta tempos e aforra cartos

A Axencia Galega da Calidade Alimentaria (Agacal)  en colaboración coa Oficina Agraria Comarcal de Carballo, organizou recentemente unha xornada informativa e demostrativa sobre sementeira de millo en faixas mediante un sistema de mínimo laboreo que permite aforrar tempo e diñeiro.

Nesta actividade de transferencia, que tivo lugar o pasado xoves 4 de xuño na gandería Varela Labrada SL, participaron técnicos e gandeiros de explotacións leiteiras doutras zonas de Galicia, que coñeceron de primeira man a experiencia desta granxa de Castro de Rei que emprega desde o ano 2019 este método aínda novidoso en Galicia.

“Os equipos Strip Till permiten a preparación da cama para a sementeira directa do millo sen ter que levantar o cultivo precedente, o que aforra tempo e diñeiro nas labores previas”, explica José Manuel Pedreira, técnico da Oficina Rural de Carballo, que organizou a xornada en colaboración coa oficina de Meira.

Este método, novidoso en Galicia, evita ter que arar o cultivo precedente

Neste momento hai arredor de media ducia de máquinas deste tipo traballando en Galicia nas provincias da Coruña e Lugo principalmente, tanto en granxas particulares como Varela Labrada, Gandería O Campo de Mesía, García de Mixón de Cerceda ou Casa Barbeiro na Mariña, como en empresas de servizos como Ónega Ares, pertencente ao Grupo Agroamb.

Aforro de tempo e de cartos

José Manuel destaca as posibilidades deste tipo de maquinaria para labrar o millo na maior parte de Galicia, así como para outro tipo de cultivos. “Noutros países estase a usar en colza e cultivos de horta”, indica. “Supón un cambio de cultura á hora de traballar e require práctica, pero esta máquina encaixaría en moitas zonas de Galicia”, asegura.

Coa suba do gasóleo, como consecuencia da guerra en Oriente Medio, a sementeira do millo encareceuse nesta campaña en Galicia entorno a un 15%

Ao evitar ter que levantar o cultivo precedente proporciona un considerable aforro económico na sementeira do millo, un dos principais gastos que afrontan as explotacións leiteiras ao longo do ano.

O equipo está formado por un tren traseiro de apeiros que inclúe primeiro a fresa que prepara o terreo e inmediatamente despois a sementadora, con sistema de abonado en liña incorporado. Deste xeito, permite realizar os tres traballos (preparación da terra, abonado e sementeira) nunha única pasada de tractor, cun importante aforro en tempo e combustible.

Maior rapidez e menor dependencia da climatoloxía

A habitual rotación millo-herba levada a cabo polas explotacións leiteiras en Galicia está moi condicionada pola climatoloxía, que ás veces ofrece unha ventá de oportunidade moi curta para o ensilado da herba, a preparación das terras e a posterior sementeira do millo.

Acurtar tempos permite sementar antes o millo e ter unha maior produción forraxeira

Por iso, reducir tempos nas distintas labores necesarias pode marcar en ocasións a diferenza entre labrar o millo no momento óptimo ou facelo xa tarde, coa conseguinte redución de produción forraxeira e de calidade de ensilado, sobre todo polo maior risco de fungos en anos de chuvias no outono, ao obrigar a retrasar a época de recollida.

“Nalgúns casos deixouse de sementar herba no outono-inverno porque comprometía o cultivo principal da rotación, o millo, ao retrasar a súa sementeira, obrigando a botar un ciclo máis curto e, polo tanto, menos produtivo. Noutros casos, pola contra, optouse por reducir a superficie labrada a millo e deixar unha parte das fincas a pradeira permanente”, explica José Manuel.

Ao non ter que arar, aínda que chova, pódese entrar antes a labrar

Pero calquera das dúas estratexias reducen a produción forraxeira propia, ben sexa de millo ou de herba, diminuíndo o nivel de autosuficiencia alimentaria da granxa e obrigándoa a depender de insumos externos, cuxo prezo está suxeito a episodios de volatilidade que poñen en risco a estabilidade económica da explotación.

Por iso, razoa José Manuel, esta máquina, que favorece unha implantación rápida do cultivo do millo, “permite sacar maior proveito á rotación millo-herba e á superficie agraria da que dispoñen as explotacións leiteiras, que moitas veces é escasa”, di.

Un sistema primado a través da PAC

A estratexia europea para a agricultura do futuro busca fomentar a través da PAC, por medio dos ecorreximes vinculados a prácticas agrícolas baixas en carbono, entre outros sistemas, a sementeira directa e o mínimo laboreo.

Con esta máquina evítase a erosión e a perda de nutrientes que provoca o laboreo intensivo no solo

“As ganderías deben buscar alternativas aos métodos tradicionais de sementeira do millo, que implican un sistema de rotación intensiva co levantamento do cultivo previo, no caso de Galicia normalmente a pradeira, por medio do arado e o fresado de toda a superficie, o que provoca un maior risco de erosión e de perda de nutrientes”, coclúe o técnico da Oficina Rural de Carballo.