Galego
Alomenos sete granxas das comarcas de Ordes e de Santiago quedan sen comprador para o leite a partir do venres 1 de abril. Leche Río decidiu abandonar a recollida desas explotacións, alegando dificultades de acceso, e as gandeirías aínda non atoparon alternativas. O Sindicato Labrego pide a intervención da Consellería de Medio Rural para buscar solucións e evitar que quede leite sen recoller no campo, segundo advirte a organización en nota de prensa.
As explotacións afectadas, ás que Río lles estivo recollendo o leite os últimos anos, son de Ordes, Frades, Tordoia e da comarca de Santiago, segundo os datos que manexa o Sindicato Labrego. Son todas pequenas granxas rexentadas por mulleres maiores de 50 anos que teñen na gandeiría a súa única adicación profesional.
Desde o Sindicato Labrego consideran que pode haber máis gandeirías afectadas polo problema e lamentan a impunidade coa que consideran que operan as industrias lácteas.
A organización demanda a intervención urxente da Consellería do Medio Rural para buscar unha solución para as explotacións afectadas. Desde o Sindicato advirten de que esta solución non pode pasar por entregar o leite a prezos de po, por baixo dos 20 céntimos.
O sector leva uns días á expectativa do que sucede coas explotacións que deixa Río e que aínda non atoparon comprador. Días atrás, Unións Agrarias cifraba nunhas 15 granxas as que se poderían atopar con problemas.
