Galego
Algúns dos asistentes a unha visita realizada en 2023 por gandeiros españois a Villameitide SL, en Trabada (Lugo)
As primeiras explotacións galegas que se decidiron a facer cruzamentos nos seus rabaños de vacas frisonas seguindo o sistema Procross para mellorar aspectos produtivos, de fertilidade e de saúde do gando fixáronse en ganderías de EEUU e de países europeos como Holanda, Dinamarca ou Portugal.
Agora, máis de 10 anos despois, estas ganderías galegas pioneiras servirán de exemplo a explotacións de México e Ecuador. Unha expedición de 35 persoas, formada por gandeiros, técnicos e distribuidores de xenética destes países centroamericanos, visita esta semana Galicia para coñecer de primeira man o funcionamento de catro destas granxas, situadas nas provincias da Coruña e Lugo.
Os gandeiros e técnicos centroamericanos poderán acceder aos datos das explotacións e coñecer de primeira man os seus resultados produtivos e de rendibilidade económica
A visita forma parte dunha viaxe por Europa que os levará tamén a coñecer ganderías en Francia de vacas montbeliarde, unha das tres razas, xunto coa roja sueca e a frisona, que conforma o sistema de cruzamento rotacional Procross.
Entre as explotacións que visitarán en Galicia hai tanto granxas con robots como ganderías con muxidura en sala, tanto 2 como 3 veces ao día
A chegada a Galicia está prevista para o xoves 6 ao mediodía. Pola tarde, iniciarán a súa visita na gandería Pazos SCG, ubicada en Olveira (Dumbría). Ao día seguinte, o venres 7, coñecerán tres granxas na provincia de Lugo, Villameitide SL, situada en Trabada, Condado SL, en Castro de Rei e Gallardo SC, en Guntín.
As visitas están organizadas por Global Genetics, empresa responsable do sistema Procross en España.
Control OJD
