Galego
Galicia súmase este domingo á primeira celebración do Día Mundial da Abella, declarado pola ONU o pasado mes de decembro. Recoñécese deste xeito a importancia destes insectos para a vida no planeta, polo seu papel esencial como polinizadores da flora, tanto da salvaxe como dos cultivos para consumo humano.
E é que máis do 75 por cento dos cultivos alimentarios do mundo dependen en certa medida da polinización para obter rendementos e calidade. A ausencia de abellas e outros polinizadores eliminaría o café, as mazás, améndoas, tomates e o cacao, por citar tan só algúns dos cultivos que dependen da polinización.
En Galicia, e malia as ameazas como a Vespa Velutina ou a perda de biodiversidade coa expansión das plantacións de eucaliptus nitens, a apicultura é un sector en alza ao que se dedican de forma profesional ou semiprofesional miles de persoas. Mostra deste “boom” é a evolución do Censo Apícola de Galicia, que pasou dunhas 90.000 colmeas rexistradas en 2010 a arredor de 160.000 en 2017.
Na web www.worldbeeday.org pódense ver parte dos eventos que hai convocados ó longo do planeta.
Actos previstos en Galicia
A Asociación Galega de Apicultura (AGA) festexará este día en Allariz no Festival Internacional de Xardíns, con motivo da creación da Escola Galega de Apicultura e o remate do Curso Superior de Apicultura Comercial. Ademais as DAGAs tamén celebrarán este día con varias actividades.
A continuación publicamos un resumo dos lugares e actividades a realizar.
Allariz:
Festival Internacional de Xardíns de Allariz. De 11 h. a 14 h.
Obradoiros, degustacións e información sobre os produtos apícolas e a loita contra a Vespa velutina, por parte do alumnado do Curso Superior de Apicultura Comercial, que atenderán a todos os abelleiros e abelleiras que se acheguen ese día.
Baiona:
Organizada por DAGA RÍAS BAIXAS celébrase este domingo a II Feira Apícola Val Miño. Será no da Paseo Ribeira, na entrada do Parador.
Narón:
DAGA Ferrolterra celebra Día Mundial da Abella no Centro Comunitario Municipal Manuela Pérez Sequeiros.
-Ás 10 h. “Técnicas de control da velutina por estacións”, polo Grupo de Traballo de AGA.
-Ás 11.30 h. “Apiterapia, uso terapéutico dos produtos da colmea”, por José Castro, apiterapeuta. Ó finalizar as charlas haberá un xantar de irmandande.
Actos da Asociación Apícola Ourensá e da Agrupación Apícola de Galicia
Tamén a Asociación Apícola Ourensá celebrou o Día Mundial da Abella na Casa Museo de Otero Pedrayo, en Amoeiro (Ourense). Ducias de persoas participaron pola mañá nun obradoiro de elaboración de fórmulas con própole
Foto gañadora do Concurso Apifotográfico da Agrupación Apícola de Galicia
A Agrupación Apícola de Galicia tamén celebrou o Día Mundial da Abella co Concurso APIFotográfico no que participaron máis de 30 apicultores. O gañador foi Marcos López Fernández, coa súa foto facendo garda no seu apiario para cazar velutinas.
Tamén a Casa do Mel de Goente, en As Pontes, celebrou este domingo actos co motivo do Día Mundial da Abella.
A FAO lembra que “as abellas necesitan protección para garantir o futuro dos nosos alimentos”
A Organización das Nacións Unidas para a Alimentación e a Agricultura (FAO) insta os países e ás persoas a facer un maior esforzo para protexer ás abellas e outros polinizadores, “ou arriscarse a sufrir unha diminución drástica da diversidade alimentaria”.
Neste sentido, a FAO advirte de que “as abellas están gravemente ameazadas polos efectos combinados do cambio climático, a agricultura intensiva, os praguicidas, a perda de biodiversidade e a contaminación”.
O Director Xeral da FAO, José Graziano da Silva, presente en Eslovenia para a cerimonia oficial de conmemoración do Día Mundial das Abellas, asegurou que os países deben adoptar políticas e sistemas alimentarios máis favorables aos polinizadores.
“Non podemos seguir centrándonos en aumentar a produción e a produtividade en base ao uso xeneralizado de praguicidas e produtos químicos que ameazan os cultivos e aos polinizadores”, advertiu Graziano da Silva.
“Debemos agora converter as nosas palabras en acción, e levar a cabo actuacións específicas para manter as abellas e outros polinizadores, asegurando así a súa supervivencia e, por conseguinte, nosa propia supervivencia”, dixo pola súa banda o ministro esloveno de Agricultura, Bosques e Alimentación, Dejan Židan.
A cerimonia oficial para o primeiro Día Mundial das Abellas celébrase este domingo na localidade eslovena de Breznica, a 50 km ao noroeste da capital, baixo o patrocinio do presidente de Eslovenia, Borut Pahor. Breznica é o lugar onde naceu en 1734 Anton Jansa, un apicultor e pioneiro da moderna apicultura. A súa data de nacemento, o 20 de maio, foi elixida para ser celebrada cada ano como Día Mundial das Abellas.
Eslovenia, xunto coa FAO, contribuíu a establecer o día internacional a través dunha resolución da Asemblea Xeral aprobada por unanimidade o ano pasado, co apoio de Apimondia -a Federación Internacional de Asociacións de Apicultores-, a Asociación de Apicultores de Eslovenia e o Ministerio esloveno de Agricultura, Bosques e Alimentación.
