Galicia busca fabricar guitarras con madeira galega

A Xunta de Galicia puxo en marcha un novo proxecto para explorar as posibilidades da madeira galega na fabricación de instrumentos musicais. A iniciativa, denominada ‘Guitarra, son de madeira galega’, está impulsada pola Axencia Galega da Industria Forestal (XERA) e foi presentada durante a última edición do ciclo Música no Claustro, celebrada a semana pasada na Catedral de Tui.

O proxecto contempla o estudo e construción dunha guitarra elaborada integramente con madeiras galegas, co obxectivo de analizar as posibilidades que ofrece o produto local e avanzar en novas aplicacións para o sector forestal.

O director de XERA, Alfredo Fernández Ríos, explicou que xa se celebrou unha primeira xornada de traballo na que se estudaron as posibles madeiras que poderían empregarse na construción do instrumento. Nas seguintes fases abordaranse o deseño e a documentación do produto seleccionado, así como o estudo do seu comportamento acústico. Finalmente, os resultados serán divulgados.

Luthiers e músicos, unidos no proxecto
A dirección da iniciativa correrá a cargo do Laboratorio de Cordas, formado polos luthiers galegos José Catoira e Pablo Sánchez. O equipo contará tamén coa colaboración do músico e investigador Samuel Diz e da xestora cultural e comunicadora audiovisual Beatriz Fontán, directora do podcast Resonancias.

Segundo XERA, o proxecto pretende ir máis alá da fabricación dun instrumento e servir para valorizar a madeira galega como recurso, ao tempo que se promove a creación contemporánea, a innovación e a transmisión do patrimonio cultural.

Os responsables da iniciativa prevén dar a coñecer os avances do proxecto durante o último trimestre deste ano.