Freshcut prevé un aumento do 50% na súa produción de purés e cremas de verduras

Freshcut cumpre este 2025 o obxectivo de incrementar a produción dos seus produtos  da marca Galifresh, fundamentalmente purés e cremas de verduras. O seu crecemento consolidarase coa entrada en funcionamento dunha nova nave de máis de 3.000 m².

A empresa, ubicada en Gondomar (Pontevedra), prevé un incremento do 50% na produción respecto aos máis de 24 millóns de purés de froita preparados o ano pasado. No caso das cremas de verduras e leguminosas, estímase superar os 500.000 litros antes de rematar o ano. Todos os produtos son naturais e elaborados con ingredientes de primeira calidade.

Os purés de froita, feitos con 100 % froita e sen azucres engadidos, seguen criterios nutricionais e están pensados para públicos de todas as idades. Máis da metade distribúese a hospitais, residencias e centros educativos, mentres o resto se vende nas principais cadeas de alimentación.

Tras o éxito dos purés, a empresa lanzou unha gama de cremas frescas e sopas frías, pensadas para quen busca unha dieta equilibrada sen dedicar tempo a cociñar. A terceira gama Galifresh incorpora untables vexetais, tamén 100 % naturais, froito da labor do departamento de I+D+i.

Freshcut pertence a un grupo empresarial familiar e promove un impacto social positivo mediante a integración sociolaboral de persoas con diversidade funcional. Fundada como centro especial de emprego, actualmente o 70 % do seu persoal ten diversas capacidades.

O coidado do medio ambiente é unha prioridade. A empresa aposta por provedores locais para reducir emisións de CO₂ e utiliza envases 100 % reciclables con selo Ecoembes.

A nova nave foi construída seguindo criterios ambientais e está equipada con paneis fotovoltaicos para autoconsumo. Os procesos produtivos seguen criterios de eficiencia, respecto ao entorno e seguridade alimentaria.

Freshcut completa o ciclo produtivo cun proxecto de economía circular, que transforma residuos orgánicos de froitas e hortalizas en abono biolóxico mediante vermicompostaxe, en colaboración cunha empresa especializada da zona.