O Fondo Español de Garantía Agraria (FEGA) publicou este venres o importe provisional da axuda asociada da PAC para as gandarías que manteñan vacas nutrices neste 2020.
Para esta axuda diferéncianse dúas rexións: España peninsular e rexión insular. A dotación orzamentaria ascende a 187.294.000 € para a rexión España Peninsular e 451.000 € para a rexión Insular.
O FEGA fixou para esta campaña os importes unitarios provisionais seguintes:
– Para a rexión España Peninsular: 90,11 €/animal
– Para a rexión Insular: 148,92 €/animal
As comunidades autónomas poderán realizar o pago de anticipo antes do 1 de decembro de 2020 no caso desta axuda á vaca nutriz, que poderá alcanzar até o 70 % do pago total. Con posterioridade as comunidades autónomas comunicarán de novo ao FEGA, antes do 15 de marzo de 2021, o número total de animais determinados para o pago da axuda, con obxecto de poder calcular o importe unitario definitivo a aplicar, tanto aos pagos pendentes como aos pagos complementarios aos xa realizados con este importe unitario provisional.
Recalcar o carácter provisional do importe unitario establecido de cara o pago do anticipo. Coa información que remitan as comunidades autónomas correspondente ao número total de animais determinados para o pago da axuda en marzo do ano próximo, o importe unitario definitivo que se calcule a partir destes novos datos podería variar respecto o importe provisional, e non sempre tería que facelo á alza.