Finsa creará nas Pontes un centro de divulgación forestal

O alcalde das Pontes, Valentín González Formoso, acompañado dunha delegación de Finsa, da Fundación Ria e do Instituto Tecnolóxico de Massachusetts (MIT), vén de visitar a finca de Panda da Dá, nas Pontes, onde a empresa madeireira galega quere crear un centro de divulgación forestal.

O motivo desta visita era coñecer de primeira man a finca de 410 hectáreas adquiridas por Finsa no 1989 e que, xa desde aquela, están sendo empregadas dun xeito informal para a práctica e difusión dun modelo de xestión forestal pioneiro, que fomenta boas prácticas e garante a produción madeireira mediante certificacións de sustentabilidade recoñecidas.

Ese traballo quérese agora consolidar coa rehabilitación das edificacións que alberga o monte, co obxectivo de poñer en marcha un centro de divulgación forestal.

Así, o rexedor local apuntaba que “o alumnado de arquitectura do MIT ven coñecer As Pontes, a súa realidade forestal e as posibilidades que teñen as instalacións, dunha das grandes propietarias forestais das Pontes, para a compatibilización de actividades económicas coa preservación do medio ambiente e das especies forestais autóctonas, e tamén as industriais, e en definitiva, todo o que ten que ver co ecosistema do monte galego”.

Un monte que Finsa, en colaboración coa Fundación Ría, busca situar como un espazo clave para promover a xestión territorial sostible, multifuncional, en relación cos diferentes axentes do territorio, a través dun concurso de arquitectura, que se atopa xa na súa segunda fase, que ten como obxectivo rehabilitar as edificacións da finca, potenciando o seu valor como espazo, a nivel mundial, de divulgación, formación e investigación, renovándoas para recibir visitas de profesionais e entidades dedicadas á xestión territorial e a cadea de valor da madeira, xerando así novas oportunidades de aprendizaxe e colaboración no sector forestal.

Manuel Rodríguez, director da Fundación Ría indicaba que esta fundación, sen ánimo de lucro, “leva anos colaborando con Finsa no desenvolvemento e deseño da ordenación desta finca para convertela nun centro de referencia da xestión forestal”.

Pola súa banda, Carlos Iglesias, encargado de xestión forestal de Finsa, detallaba máis polo miúdo as características da parcela, que consta de dous núcleos urbanizados, a Panda da Dá e As Pereiras, que son os que se van rehabilitar nesta primeira fase do proxecto. Ademais a finca, de 400 hectáreas, está dividida en dúas zonas: a parte dedicada a produción forestal, que está ocupada por piñeiros; e outra área dedicada á conservación de hábitats naturais, asociada ás zonas de ribeiras de ríos.

Esta segunda zona é de especial interese para Finsa, xa que como indicaba Carlos Iglesias, “obtivemos agora recentemente a certificación en servizos ecosistémicos pola biodiversidade desas áreas asociadas aos cursos fluviais, e ten a súa importancia porque ao mesmo tempo que tés unha xestión forestal dedicada á produción, tamén tés un espazo reservado para a conservación deses hábitats. Estamos nunha zona na que hai carballeiras e bosque atlántico, que merece a pena conservar”.

CONCURSO DE ARQUITECTURA ABERTO PARA REHABILITAR A PANDA DA DÁ

No ano 2024, Finsa, coa colaboración de Fundación Ría, lanzou un concurso de arquitectura para continuar transformando a súa finca da Panda da Dá e consolidala como un espazo de oportunidades para a xestión sostible do territorio.

Esta convocatoria ten como obxectivo rehabilitar arquitectónica e paisaxisticamenteo monte de 410 ha para dar cabida a novas actividades formativas e de investigación, así como servir de soporte a visitas de entidades relacionadas coa xestión do territorio e a cadea de valor da madeira.

A proposta gañadora recibirá un premio de 20.000 euros e a adxudicación do proxecto básico e de execución da rehabilitación, mentres que os outros catro finalistas recibirán un premio de 5.000 euros cada un, como compensación polo seu traballo.