Galego
A Federación Española de Asociacións de Gando Selecto (Feagas) puxo en marcha un sistema que permite a realización de poxas gandeiras en formato virtual a través da plataforma irlandesa LSL Auctions. Trátase dun servizo que pon a disposición de tódolos seus asociados para que, no próximo ano, poidan realizar poxas de gando tanto en formato virtual como en formato mixto, con posibilidade de levalas a cabo en tempo real.
Feagas, co apoio do Ministerio de Agricultura, Pesca e Alimentación (Mapa), lanza este servizo despois de que a pandemia do Covid-19 e as restricións impostas pola alerta sanitaria provocasen que a gran maioría dos certames gandeiros non se puideran celebrar de maneira presencial. Cada vez máis entidades e asociacións optaron por levar a cabo estas feiras e poxas de maneira virtual, para seguir apoiando ao sector e continuar con compra-venda de animais entre gandeiros, e Feagas tamén se decidiu a dar o paso.
A súa intención é que este servizo se utilice a futuro e se implemente na mecánica natural de celebración de poxas gandeiras cando se acaben as restricións. Feagas optou por un sistema que ofrece versatilidade, fiabilidade e escalabilidade para poder realizar poxas de todo tipo: 100% online sen subastador, 100% online con subastador en tempo real, ou modelo mixto con participación de gandeiros de maneira presencial e virtual. “Este enfoque fará que a ferramenta poida ser interesante para o sector, non soamente durante a pandemia pola suspensión de certames e poxas presenciais de gando”, xustifican dende o colectivo.
Ao poder combinar o formato online das poxas co presencial, desde Feagas agardan que isto se traduza nunha maior notoriedade e volume de participantes, e polo tanto máis probabilidades de adxudicacións ao brindar a posibilidade de participación a persoas que por diferentes motivos non poidan asistir de maneira presencial no día e a hora indicados.
A primeira experiencia
O sistema xa foi utilizado con éxito na LXXXIII Poxa Nacional de Gando bovino de Raza Pura da Comunidade de Madrid (Colmenar Viejo) do pasado 19 de decembro. A poxa realizouse integramente online e coa modalidade de poxa en tempo real, que tivo moi boa acollida entre os gandeiros e as asociacións de raza pura participantes. Chegouse mesmo a superar o número de exemplares adxudicados doutras edicións presenciais celebradas anos anteriores e o número de cartóns tanto participantes como compradores.
Varias das organizacións de raza pura integradas en Feagas trasladáronlle xa a súa intención de utilizar o sistema nos próximos meses, xa que consideran que a ferramenta pode contribuír tamén á modernización e éxito das poxas de gando selecto.
