Dificultades para pasar a ITV Agrícola en prazo

O Concello de San Sadurniño solicitaralle ó Estado unha ampliación da validez das ITVs para vehículos agrícolas ante o atraso acumulado nas citas das unidades móbiles

Publicidade
Dificultades para pasar a ITV Agrícola en prazo

Punto de inspección técnica de vehículos.

Varias chamadas de veciños para preguntar sobre as datas nas que a unidade móbil da ITV agrícola chegaría a San Sadurniño (A Coruña) puxeron sobre aviso ao Concello das dificultades para pasar a revisión en prazo. A concesionaria das inspeccións, SyC APPLUS+ITV, confirmoulle ao rexedor que non prevén desprazar ningún equipo ata polo menos xaneiro ou febreiro do 2021, debido aos atrasos acumulados nos últimos meses.

Polo momento, a validez das inspeccións técnicas para os vehículos agrícolas destinados a labores no campo, tal e como cita o BOE, está prorrogada até o 10 de novembro, pero descoñécese que acontecerá despois desa data cos vehículos que non poidan ter a ITV ó día. “Na ITV non comentaron nada ao respecto, posto que a súa función é a de verificar o correcto estado de circulación da maquinaria, non a de decidir como debe actuar Tráfico en caso de parar un vehículo agrícola sen a inspección en vigor”, detallan dende o Concello.

Ante esta situación, O Concello de San Sadurniño tamén se puxo en contacto coa Delegación do Goberno na Coruña para solicitarlle información sobre se se conta ampliar a vixencia das inspeccións ou, en caso contrario, se se vai dar algunha instrución dende a Dirección Xeral de Tráfico no sentido de flexibilizar as posibles actuacións, no caso de vehículos agrícolas que deberían ter pasado a ITV desde a declaración do primeiro Estado de Alarma.

“Sería un gran inconveniente que os tractores tivesen que ir á ITV da Gándara pasar a revisión despois do 10 de novembro, cando antes tiñan garantida unha inspección tódolos anos en Santa Mariña, en Igrexafeita e en Moeche. Ademais tamén sería inxusto que calquera veciña ou veciño fose multado despois desa data por non ter a revisión pasada se lles caducou durante o estado de alarma, xa que non é culpa deles que as unidades móbiles vaian con atraso no seu calendario”, comenta o alcalde do municipio coruñés, Secundino García.

Desde a Delegación do Goberno remítense á normativa da prórroga ata o 10 de novembro, sen avanzar se o prazo se vai ampliar, aínda que tampouco descartan esa posibilidade. Polo momento, recomendan solicitar vez na estación máis próxima a pesar de recoñeceren o inconveniente que supón ter que levar a maquinaria ata alí, sexa desprazándose polos seus propios medios ou sobre unha plataforma. Tampouco se aclara como vai proceder Tráfico a partir desa data se as patrullas detectan algún tractor circulando sen a ITV ao día. Fontes da Delegación aseguran que a Xefatura provincial de Tráfico “está ao tanto e comprende a situación”, ao tempo que recordan que o feito de circular sen ITV é un risco para a seguridade e, ademais, unha complicación legal engadida no caso de que se produza un accidente.

Peticións para axilizar as revisións

Desde o Concello enviarán unha solicitude oficial dirixida a SYC APPLUS+ ITV co obxectivo de que se “axilice no posible” o calendario de inspeccións itinerantes para vehículos agrícolas, ante a incerteza de que vai ocorrer despois do 10 de novembro.

Tamén teñen previsto cursar unha petición á Delegación do Goberno para que se amplíe a prórroga das inspeccións polo menos 2 meses máis, como única maneira de asegurar que tractores e outra maquinaria circulan dentro da legalidade mentres agardan pola revisión.

Con todo, desde o Concello volven lembrar a necesidade de ter sempre os vehículos en orde de revista, independentemente de que lles toque ou non pasar a ITV. Inciden na importancia de ter en perfectas condicións as rodas, os freos e todo o sistema de iluminación e indicación. Por seguridade tamén cómpre ter en bo estado a dirección, os enganches de apeiros, tendo ben protexidas as tomas de forza, e, se se pode, dotar o vehículo dun arco ou unha cabina homologada que protexa no caso de envorcamento, principal causa de morte en Galicia por accidentes no agro.

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información