A Festa da Pataca de Coristanco celebra este domingo 16 o seu día grande, cun desfile de tractores engalanados con figuras feitas coas patacas a partir das 11.30 horas. Haberá tamén degustación gastronómica e á tarde os tradicionais concursos ligados á pataca. Durante estes días, os locais de hostelería de Coristanco tamén participan nunha Ruta dos Pinchos, en horario de 20 a 23 horas, que ten ó produto estrela da comarca de Bergantiños como gran protagonista.
A pataca de Coristanco, a maioría de variedade kennebec ou, en menor medida, fina de Carballo, destaca no mercado polo recoñecemento que atopa entre os consumidores. O seu prestixio lígase a un coidado que inclúe a recollida a man, o que contribúe a unha mellor preservación, e ás características das variedades cultivadas e do seu resultado na comarca.
O programa de actos da Festa da Pataca de Coristanco, que ten arredor de 7.000 euros en premios, é o seguinte:
Sábado 15
– 12 h. – Concentración de coches clásicos na praza do Concello. Farán un percorrido por varias zonas do Concello.
– 17 h. – Xogos infantís, gratuítos e instalados na praza do Concello.
– 19 h. – Inauguración dunha exposición do curso de pintura organizado pola asociación de veciños Santa María de Traba. (No edificio da antiga Cámara Agraria).
– 22.30 – Verbena nocturna (Orquesta D’nivel).
– Ruta dos Pinchos, que conclúe este sábado 15, en horario de 20 a 23 horas nos seguintes locais: Arume, Il Molino, Trincado, Anabel, Alaska, A Pataca, Verxel.
Domingo 16
– 9.30 h. – Concentración de tractores fronte ó Concello. Concursos gastronómicos, de produtos do campo, de empanadas e de figuras con patacas.
– 11.30 h. – Desfile de tractores engalanados con figuras elaboradas coas patacas.
– 13 h. – Pregón, a cargo de Carlos Fernández, director do colexio Alcalde Xosé Pichel. Entrega de premios ó remate do pregón.
– 14 h. – Apertura do recinto e degustación de patacas na rúa do Muiño. Xogos infantís a partir das 16 horas.
– 17 h. – Concursos: Baile da pataca, Apaña a pataca, Trueiro da pataca e Tira da corda.
– 20 h. – Concerto de corais.
– 21 h. – Verbena (Trío Mayel), no parque.