Innogando desenvolve, xunto con COVAP, un sistema pioneiro de monitorización intelixente para o porco ibérico en montanera

A empresa agrotech galega Innogando, xunto co seu socio, a cooperativa cordobesa COVAP, completou con éxito un proxecto innovador de monitorización intelixente do porco 100% ibérico en montanera. Esta iniciativa, convértese así no primeiro sistema específico para o sector porcino ibérico.xunto co seu socio, a Cooperativa Cordobesa COVAP, completou con éxito un proxecto innovador de monitorización intelixente do porco 100% ibérico en montanera. Esta iniciativa, convértese así no primeiro sistema específico para o sector porcino ibérico.

Este proxecto, impulsado no marco de GEN, o programa de innovación aberta de COVAP, tras máis de tres anos de traballo, supón un avance significativo na dixitalización do sector porcino, ao permitir analizar por primeira vez o comportamento do animal en condicións reais de liberdade.

Durante a campaña de montanera 2025-2026 validamos PORCI en devesa mediante unha piara piloto de 16 porcos ibéricos, equipados con dispositivos deseñados especificamente para adaptarse á súa fisioloxía e ao seu entorno natural.

O dispositivo PORCI acada unha precisión do 94% na interpretación do comportamento animal

“A nosa tecnoloxía, baseada en sensores avanzados, Internet das Cousas (IoT) e algoritmos de intelixencia artificial, foi validada mediante un exhaustivo período de observación directa en campo, acadando unha precisión do 94% na interpretación do comportamento animal”, explican desde Innogando. Para garantir a precisión, os algoritmos de Intelixencia Artificial foron validados polo Centro Tecnolóxico de Innovación e Investigación Agroalimentaria (CICAP).

Resultados que achegan un novo coñecemento da montanera

Os datos obtidos a través de PORCI permítennos dispoñer dunha radiografía precisa do comportamento do porco ibérico de bellota:

• Máis de 14 horas de descanso diario
• Máis de 8 horas de actividade de alimentación (“belloteo”)
• Entre 8 e 10 quilómetros percorridos ao día por animal

En conxunto, a piara monitorizada percorreu máis de 10.000 quilómetros nun período de 69 días, o que nos permite comprender con maior precisión o esforzo físico do animal e a súa adaptación ao ecosistema da devesa.

O porco ibérico de bellota pasa 14 horas descansando e 8 comendo e percorre entre 8 e 10 km cada día

Así mesmo, o sistema permítenos analizar a relación entre o comportamento animal e factores como a climatoloxía, a dispoñibilidade de alimento ou a xestión das parcelas, achegando información clave para a toma de decisións en gandería.

Impacto directo na gandería e no consumidor

A implantación deste dispositivo introduce un cambio relevante na forma de xestionar a montanera, ao permitir dispoñer de información obxectiva e continua sobre o comportamento do animal.

Para o sector gandeiro, isto tradúcese nunha mellor toma de decisións e nun aproveitamento máis eficiente dos recursos da devesa, ao contar con datos reais sobre actividade, movemento e patróns de comportamento.

Desde o punto de vista do consumidor, a tecnoloxía permite avanzar cara a unha trazabilidade máis transparente, incorporando ferramentas como mapas de calor que certifican a vida en liberdade do animal durante todo o proceso.

Ao mesmo tempo, o coñecemento detallado do comportamento animal facilita adaptar o manexo ás súas necesidades reais, contribuíndo á mellora do benestar e á optimización dos sistemas produtivos.
Este tipo de solucións supoñen tamén un impulso á modernización do sector, facilitando a incorporación de ferramentas dixitais e facendo máis accesible a xestión para as novas xeracións de gandeiros.

Tecnoloxía deseñada para o entorno real

O desenvolvemento desta innovación supuxo afrontar retos técnicos relevantes, como a cobertura en zonas remotas, a adaptación á fisioloxía do porco ibérico durante a montanera ou o deseño de sistemas de suxeición que garantan o confort do animal.

O resultado é unha solución única no sector, concibida para integrarse de forma natural no comportamento do animal e nas condicións esixentes da devesa.