Galego
O presidente da Federación Galega de Porcino (Fegapor), José Antonio Vidal, cualifica a situación económica do sector de “desastrosa” debido a uns prezos anormalmente baixos que están a provocar a paralización dos investimentos previstos e o peche ou reconversión das pequenas explotacións.
“No cebo que se manda a matadoiro estamos rozando o límite de custos ou perdendo entre tres e cinco euros por porco. E no leitón é un desastre: cústanos facer un leitón de 20 quilogramos en torno a 45 euros e estámolos vendendo a entre 30 e 32 €”, explica en declaracións a Campo Galego.
Vidal cualifica a situación de “atípica, pois o leitón sole empezar a recuperar en outubro, porque agora estamos facendo a carne de febreiro, que é cando o prezo do porco cebado xa debería subir”.
En canto ás medidas de almacenamento privado postas en marcha este verán pola Comisión Europea para deter a caída de prezos, o presidente de Fegapor considera que “non deron resultado e só serviron para tirar para abaixo dos prezos cando había unha leve recuperación”.
“O prezo do leitón é anormalmente baixo”
Vidal considera que o problema de fondo “é o veto ruso ás exportacións de porcino da UE, que serviu para fortalecer aos produtores de porcino de Brasil e de Estados Unidos, e na Unión Europea non somos capaces de consumidor todo o porcino que se produce”.
Neste sentido, sitúa a baixada de prezos da carne de porcino en España das últimas semanas “nun intento de equipararse cos prezos do porcino en Alemaña e aumentar as exportacións”.
Reconversión do sector porcino en Galicia
A situación de baixos prezos e a incerteza en canto á súa recuperación están a provocar, segundo o presidente de Fegapor, a paralización dos investimentos previstos en Galicia en ampliación ou na modernización de granxas e unha reconversión do sector.
Así, “dende hai seis meses houbo un cambio total: os proxectos de ampliación e de investimentos están paralizados, e dez explotacións de volume importante, con ata 700 nais, xa pecharon para reconvertelas a prazas de cebadeiros e integrarse con outra empresa porque a nivel individual é insostible”, explica José Antonio Vidal.
“As granxas de ciclo pechado estanse reconvertendo en prazas de cebadeiro”
A reconversión vese favorecida porque Galicia é demandante de prazas de cebo e os grandes integradores aproveitan para utilizar as pequenas explotacións como destino dos leitóns que producen.
“Antes a maioría dos granxeiros tiñamos un mercado aberto con varias opcións de venda (salas de despece, mercado de tratantes, matadoiros…etc), pero todo iso hoxe vai desaparecendo e coa crise vemos como cada vez quedamos menos produtores e case todos integrados porque de xeito individual é case imposible sobrevivir”, conclúe Vidal.
En Galicia as grandes intregradoras que operan no sector porcino son Nudesa, Coren, Nutripor, Nucamsa, General Ganadera Gallega e General Ganadera del Norte. Na comunidade hai preto de 1.000 produtores en ciclo pechado e entorno a 2.500 cebadeiros de porcino.
Fonte: 3tres3
