Galego
O Sindicato Labrego Galego e o Consello Regulador da IXP Faba de Lourenzá convocaron un acto o pasado luns 23 no que se xuntaron 50 produtoras e produtores de faba. No acto interveu Isabel Vilalba Seivane, secretaria xeral do Sindicato Labrego Galego e produtora de faba de Lourenzá, para abordar a actual situación do sector.
Nesta asamblea, que tivo lugar no Salón de Actos de Lourenzá, analizouse a situación actual do sector e falouse das medidas necesarias para o seu benestar. O cambio climático e a aparición de patoloxías afectaron á campaña de faba deste ano, o que reduciu a produción ate un 80% do que tería sido unha colleita habitual.
A produción de faba na comarca é unha importante fonte de ingresos, fixación de poboación e dinamización económica, ademais de ser un símbolo cultural e social. Porén, o sector está envellecendo e perdendo activos, o que ameaza a súa continuidade e implicaría graves consecuencias económicas, sociais e culturais.
Dende o SLG recordan que urxe implementar medidas de apoio, especialmente considerando que en Asturias estanse desenvolvendo iniciativas similares das que as produtoras galegas deberían beneficiarse.
No acto acordouse solicitar á Consellería de Medio Rural que inicie canto antes un diálogo co sector para abordar os seguintes temas clave:
- Establecer unha axuda directa para salvar a campaña das persoas produtoras.
- Incrementar os fondos da axuda PAC denominada “Axuda á produción sostible de proteínas de orixe vexetal”.
- Crear un equipo de traballo para analizar os efectos do cambio climático e novas enfermidades no cultivo.
Control OJD
