Dairylac, Queserías Entrepinares e Eolimia reciben case 13 millóns da Xunta para proxectos agroalimentarios

Dairylac, a industria láctea impulsada por Icos e Codeira, e na que acaba de entrar a cooperativa Aira, recibirá 4,88 millóns de euros da Xunta de Galicia para o seu proxecto industrial que está a levar a cabo no polígono de Melide.

Así se recolle na lista publicada hoxe no Diario Oficial de Galicia de axudas concedidas na convocatoria de 2016 pola Consellería de Medio Rural para os investimentos en transformación e comercialización de produtos agrarios do período 2014-2020, cofinanciadas polo Fondo Europeo Agrícola de Desenvolvemento Rural (Feader).

Dairylac é a industria máis beneficiada desta liña de axudas, con 4,88 milllóns O seu proxecto industrial céntrase na construcción dunha torre de leite en po, que iniciou a súa obra civil este outono, está previsto que comece a funcionar na primavera do 2018. Coa súa posta en marcha, Dairylac proxecta entrar no mercado dos produtos de alimentación infantil e na comercialización de proteína láctea e doutros ingredientes para a industria alimentaria.

A segunda industria máis beneficiada é Proláctea SAU, a empresa matriz de Queserías Entrepinares, que recibe 4,75 millóns. Entrepinares destinará 16 millóns de euros a ampliar as súas instalacións en Vilalba para a construcción dunha torre de secado do soro procedente da elaboración do queixo.

A terceira na lista é Eolimia, que recibe 4,17 millóns de euros. Esa empresa, propiedade do industrial de Xinzo de Limia, Jesús Gamallo, ten proxectado construír unha factoría de almidón destinado á exportación, e que se prevé que absorva ata a metade da produción de pataca da Limia. O industrial anunciou que as obras esta previsto que rematen para finais deste ano.

Coren, con 2,38 millóns, e Innolac, con 1,60 millóns, completan a lista de industrias máis beneficiadas destas axudas da Consellería para investimentos en transformación e comercialización de produtos agrarios.

Lista de beneficiarios das axudas: