A D.O Valdeorras comeza a vendima e augura unha colleita “histórica”

O Consello Regulador da Denominación de Orixe Valdeorras dá por iniciada a campaña de vendima 2024, data que celebra o 50º Aniversario do Plan Revival (Reestruturación de Viñedos de Valdeorras), que marcou un antes e un despois na forma de facer viño na comarca.

Valdeorras convértese na primeira Denominación de Orixe de Galicia en iniciar os traballos de vendima. A bodega Valdesil foi a que deu o pistoletazo de saída co comezo dos traballos na viña As Chas Vieja, en Portela de Vilamartín. A primeira uva en colleitar foi a Godello que se empregará para elaborar un viño tostado.

A colleita deste ano anticípase “histórica e ideal”, “cunha maduración máis progresiva que a do ano pasado”. Así o asegura Santiago Pérez, técnico da DO, que pon o acento ademais nunha climatoloxía favorable, no arduo traballo dos viticultores para evitar a aparición de enfermidades como o mildiu ou o oídio.

Tras as primeiras medicións, os técnicos da DO falan de “grao de alcol e acidez ideais”, datos que anticipan unha colleita de alta calidade e rendemento satisfactorios. “Os resultados prometen ser excepcionais, son un reflexo do que xa estamos a ver, nos numerosos premios que estamos a obter, na marca de vendas; os nosos viños están mellor que nunca”, afirma Pérez.

Plan Revival, un cambio na viticultura de Valdeorras
Para José Ramón Rodríguez Casteláns, presidente da DO Valdeorras, o Plan Revival “foi algo extraordinario para a nosa zona, foi o plan que cambiou a nosa viticultura e que, entre outras moitas cousas, recuperou a Godello para Valdeorras e para o mundo”.

Desenvolvido en 1974 por un grupo de adegueiros, enólogos, viticultores, e viveiristas, co apoio das Oficinas Agrarias Comarcais de Valdeorras, o Plan Revival foi o motor do rexurdimento e desenvolvemento sustentable da viticultura na comarca, consolidando a Valdeorras como unha referencia de calidade e tradición no panorama vitivinícola nacional e internacional.

Desde a implementación do Plan Revival, adoptáronse prácticas vitivinícolas sacrificadas, innovadoras e respectuosas co medio ambiente

Durante cinco décadas, conseguiu a revitalización dos viñedos, rescatando as variedades autóctonas que hoxe en día, convertéronse en emblemas da rexión. Exemplos diso son a Mencía ou a Godello, desta última, o rescate foi da súa práctica extinción.

Grazas á investigación e desenvolvemento que o Plan Revival potenciou, Valdeorras situouse á vangarda da innovación enolóxica, sen perder de vista as súas raíces históricas. Desde a súa implementación, adoptáronse prácticas vitivinícolas sacrificadas, innovadoras e respectuosas co medio ambiente, dunha forma compartida polos pequenos viticultores da comarca, reflectindo a riqueza e diversidade do terroir de Valdeorras.

Ao longo destes 50 anos, o Plan Revival demostrou ser un modelo de éxito, garantindo a sustentabilidade e o desenvolvemento económico da rexión e aproveitando a gran diversidade de pequenas parcelas e condicións xeográficas e climáticas, o que augura un futuro prometedor.

Anuncian unha protesta na Ribeira Sacra para o 6 de setembro