Galego
Permanece aberto o prazo de inscrición no curso práctico de ‘Avaliación Análise Sensorial en Mel’, organizado polo Consello Regulador da IXP Mel de Galicia e coordinado polo Departamento da Protección da Calidade Diferenciada da AGACAL.
O obxectivo destas xornadas será adestrar de forma práctica os sentidos dos participantes (vista, olfacto e gusto) para unha correcta realización da análise sensorial do Mel de Galicia.
O curso celebrarase no Pazo de Quián en Sergude —Boqueixón— e constará de 16 horas lectivas repartidas en catro días diferentes. Concretamente, celebrarase os venres 23 e 30 de outubro, en horario de 16:00 a 20:00 horas; e os sábados 24 e 31 de outubro, entre as 10:00 e as 14:00 horas.
Para rematar, o sábado 7 de novembro terá lugar unha xornada na que se tratará a importancia do análise sensorial nos alimentos, os requisitos para a acreditación do panel de cata responsable da avaliación sensorial e a experiencia de expertos/as de distintas denominacións de orixe na avaliación sensorial.
Os interesados poderán anotarse a través do enderezo electrónico info@mieldegalicia.org ou do teléfono de contacto 981 511 913 ata alcanzar o aforo máximo, dado que o número de prazas é limitado.
Desde o Consello Regulador da IXP Mel de Galicia animan á participación, subliñando que o sector apícola constitúe unha posibilidade de negocio sostible e real, todo un motor do agro galego que favorece a vida no rural e do rural.
