A Consellería do Medio Rural, a través da Axencia Galega da Calidade Alimentaria (Agacal), ten previsto celebrar o vindeiro martes 2 de novembro en Cedeira un curso sobre técnicas de pastoreo. Impartida pola Oficina Agraria Comarcal (OAC) desta localidade coruñesa, a acción formativa está programada no auditorio municipal, en horario partido (de 11,00 a 14,00 horas e de 15,30 a 18,30 h.).
O obxectivo desta xornada é formar aos asistentes sobre o papel do pastoreo como fornecedor de alimento equilibrado para o gando, co fin de mellorar a rendibilidade e a produtividade do leite e da carne. Para iso, abordaranse as distintas técnicas de pastoreo desde o punto de vista dos seus resultados técnicos e económicos, ademais de analizar os erros máis habituais nas granxas que se inician e asentan neste tipo de sistemas. A xornada finalizará cunha visita a unha explotación gandeira que emprega a técnica do pastoreo.
A acción está dirixida en xeral a calquera persoa vinculada profesionalmente cos sectores produtivos relacionados coa agricultura, gandaría, industria agroalimentaria e cadea forestal-madeira, así como mozos e mozas do medio rural galego e persoas con expectativas de incorporación ao sector.
Para inscribirse pódese descargar a solicitude nesta ligazón e remitila cuberta ao enderezo electrónico maria.pilar.blanco.chao@xunta.es. Os interesados en obter información adicional poden chamar ao teléfono 881 930 095.