O Grupo Coren, a primeira cooperativa agroalimentaria de España, pechou a adquisición de dous millóns de quilos de castaña galega, que destinará á alimentación dos porcos da gama Selecta ao longo do próximo ano.
Manuel Gómez-Franqueira, presidente do grupo Coren, formalizou o acordo de compra con Jesús Quintá, xerente de Alibós, unha das principais empresas recolectoras e transformadoras de castaña de Galicia.
O citado acordo supón un notable aumento no volume de castaña adquirida con respecto a exercicios anteriores. En 2015, Coren adquiriu 1,5 millóns de quilos de castaña, cantidade superior á prevista a principios do ano, debido ao aumento das previsións da demanda da Gama Selecta ao consolidarse no mercado da carne de porco alimentado con castañas.
O Plan Estratéxico da Gama Selecta de porco alimentado con castañas para o período 2016-2018 prevé que a produción de Selecta continúe crecendo e, con iso, a demanda de castaña. En concreto, o obxectivo é duplicar a actual produción de carne de porco alimentado con castañas, ata
alcanzar os 22,8 millóns de quilos dentro de tres anos.
A castaña que se destina á alimentación dos porcos Selecta procede integramente de Galicia. Recóllese en tempada e logo pasa por un proceso de pelado e cocción, para evitar o amargor da casca e facilitar a súa dixestibilidade. Posteriormente conxélase, o que permite a súa conservación co obxectivo de ter dispoñibilidade para alimentar aos porcos durante todo o ano, mantendo intactas as súas propiedades nutricionais.