Galego
Os becerros de recría seguiron baixando na sesión deste martes da Central Agropecuaria de Galicia celebrada en Silleda, con fortes descensos tanto na raza frisoa e en menor medida nos becerros de cruzamento industrial.
Así, os machos frisóns de menos de 21 días perderon de media 90 euros en animal, cotizando a 179 euros, un prezo que non se vía dende o 2023, mentres que os de entre 3 e 7 semanas baixaron 49 euros e os de máis de 50 días subiron 4 euros en relación á pasada semana.
No caso dos xatos de cruzamento industrial, os machos de ata 20 días manteñen os prezos e as femias baixan 26 euros. Os de 3 a 7 semanas bixan 40 euros de media os machos e 45 as femias e os de máis de 50 días caen 34 euros os machos e 18 as femias.
Os becerros pasteiros seguen a mesma tendencia á baixa, con caídas duns 90 euros nos animais cruzados e máis de 120 nos de raza rubia galega.
Os xatos de matadoiro foron quen de resistir na sesión deste martes en Silleda, mantendo prezos nos machos de cruzamento industrial e de raza rubia galega e logrando mesmo mellorar as cotizacións no caso das femias.
O vacún maior segue mantendo bos prezos, aínda que as vacas de categoría Extra baixaron case 100 euros para pagarse a 2615 euros de media, mentres que vacas de categoría Primeira e Segunda subiron de media uns 10 euros en relación ao pasado martes.
No relativo ás mesas de prezos do resto de especies gandeiras, non houbo variacións con respecto á semana pasada, repetindo as cotizacións tanto o porcino, como os ovos, galiñas e coellos. Iso si, baixan os leitóns e as galiñas de desvelle.
Control OJD
