Galego
fixo hoxe unha chamada ás industrias lácteas para que manteñan os prezos do leite que pagan aos gandeiros de cara aos próximos meses, co fin de garantir a sustentabilidade do sector e o equilibrio na súa cadea de valor. Gómez, acompañada polo director xeral de Gandaría, Agricultura e Industrias Agroalimentarias, José Balseiros, asistiu en Madrid ao encontro “El sector lácteo español del futuro”, organizado pola Federación Nacional de Industrias Lácteas (Fenil), a patronal das industrias lácteas, con motivo do 65 Día Internacional do Lácteo.
Aproveitando esta circunstancia, a titular de Medio Rural apelou aos responsables da industria para que teñan en conta a situación dos gandeiros e os incrementos dos seus custos de produción á hora de revisar os prezos dos contratos do leite, que como adiantou Campo Galego tenden á baixa para os próximos meses.. “Trátase de que eses indicadores lles permitan aos produtores manter a súa actividade percibindo uns ingresos que cubran os custos, cunha marxe de beneficio, como calquera empresa, co fin de garantir a rendibilidade das explotacións”, subliñou a conselleira.
Ao tempo, o director xeral de Agricultura e Industrias Agroalimentarias, José Balseiros, insistiu esta mesma semana, nunha reunión convocada polo Ministerio de Agricultura, Pesca e Alimentación (Mapa) en Valladolid, na necesidade de que se respecte e se cumpra a lei da cadea alimentaria para garantir ese equilibrio na cadea de valor do leite.
“En definitiva, a Xunta solicita á industria láctea que cumpra cos produtores galegos e rexeita, de novo, calquera práctica que poña en cuestión a transparencia e equilibrio no sector lácteo. Ademais, o Goberno galego intensificará o seu esforzo e as súas xestións para que se reduza o diferencial de prezo entre o leite producido en Galicia e noutras comunidades españolas.”, subliñan dende a Consellería do Medio Rural.
A maiores, a Xunta vén de reclamar por carta axilidade ao Ministerio de Facenda para a devolución do imposto do valor engadido (IVE) pendente a persoal gandeiro, derivado especificamente da compra de pensos ou enerxía, aspectos que teñen unha importante incidencia na conta de resultados das explotacións.
O Sindicato Labrego acudirá á Axencia de Información e Control Alimentario para denunciar os contratos que destrúen prezos
Por outra parte, para o Sindicato Labrego Galego a baixada de prezos anunciada polas industrias lácteas “supón unha clarísima vulneración da Lei da Cadea Alimentaria, nomeadamente no que compete á destrución de valor na cadea como a non cobertura de custos de produción”.
Neste sentido, dende o SLG defenden que “sería estupendo contar con datos actualizados, pero a tan cacarexada como inútil Conta Láctea que ía ser a ferramenta definitiva do anterior Conselleiro, José González, mais o Director Xeral, José Silvestre Balseiros, para demostrar os custos de produción e solucionar o problema da indefensión das granxas de leite galegas, a día de hoxe non fixo máis informes, e nin a Consellaría do Medio Rural nin o Ministerio de Agricultura teñen avanzado o máis mínimo neste aspecto, deixando ás labregas indefensas ante a extorsión das industrias”.
Dende o Sindicato Labrego galego ven “fundamento abondo para acudir ante a Axencia de Información e Control Alimentario (AICA) e presentar denuncia por destrución da cadea por ofrecer prezos por baixo dos custos de produción”.
Por último, dende o Sindicato Labrego lembran que “hai semanas tamén que temos solicitado entrevista á nova Conselleira do medio Rural para trasladarlle estes problemas e os doutros sectores, sen que ata o momento se dignara tan sequera a contestar”.
