Como se van regular as excepcións á moratoria do eucalipto?

1) Novas repoboacións que substitúan plantacións existentes de eucalipto noutras ubicacións

Se o titular dunha superficie actual de eucalipto quere traspasar o seu dereito de plantación a outro propietario, este sería o proceso:

• O propietario da superficie orixinaria chega a un acordo con outro titular para cederlle o dereito á repoboación con eucalipto. É de subliñar que a superficie orixinaria debe cumprir coa actual normativa legal, é dicir, non se poden traspasar dereitos de plantación de superficies ilegais de eucalipto, por exemplo ubicadas en terras agrarias ou en franxas de protección de incendios.
• Os propietarios deben presentar o acordo de cesión de dereitos ante a Xunta para solicitar a correspondente autorización de traspaso.
• A autorización outórgase por un prazo de 3 anos. Antes do remate do prazo, o titular da superficie orixinaria deberá ter plantado a súa parcela con coníferas e frondosas.
• Só unha vez que a parcela orixinaria está reforestada, poderán utilizarse os dereitos de plantación para instalar unha nova superficie de eucaliptos, que como máximo terá un 75% da superficie orixinaria.
• Establécese unha excepción para plantacións legais ubicadas en Rede Natura. Coa idea de fomentar a retirada de eucaliptos de Rede Natura, na nova repoboación manterase o 100% da superficie a eucaliptos que tiña a parcela orixinaria.

2) Repoboacións en masas afectadas pola banda marrón

As condicións para facer plantacións de eucalipto en piñeirais afectados pola banda marrón son as seguintes:

• Eliminar totalmente o piñeiral afectado polas bandas.
• Plantar un 50% da superficie a eucaliptos e outro 50% con coníferas ou frondosas. A plantación de eucaliptos autorízase só cunha quenda de corta.
• A autorización pode denegarse se non se xustifica a gravidade da afectación da banda marrón. Este aspecto, precisa o texto do Goberno galego, poderá ser “obxecto dun desenvolvemento regulatorio”.

Por último, cómpre sinalar que chama a atención no sector forestal que o texto só se refira á banda marrón, cando en Galicia está tamén extendida a banda vermella nos piñeirais de radiata e, días atrás, o anuncio da Xunta de extensión da moratoria apuntaba a excepcións para os piñeirais afectados por ambas bandas. En concreto, a conselleira do Medio Rural cifrou a superficie afectada en arredor de 30.000 hectáreas.