Finalmente responsables de Carrefour accederon a sentar a negociar cos representantes dos gandeiros para chegar a un acordo que poña fin ao bloqueo que os produtores manteñen sobre o Carrefour da Avenida Alfonso Molina desde hai 9 días, e desde esta madrugada tamén sobre o Carrefour de Lugo. O encontro será o luns, a unha hora aínda sen concretar, na Coruña, entre os responsables de compras de Carrefour España e dos gandeiros.
Segundo informa Óscar Pose, representante de Unións Agrarias na Plataforma en Defensa do Sector Lácteo Galego, ao encontro tamén acudirán directivos das industrias provedoras de Carrefour.
Os bloqueos a Carrefour na Coruña e en Lugo mantéñense
En todo caso, os gandeiros seguirán mantendo os bloqueos na Coruña, sobre o Carrefour de Alfonso Molina e sobre o Alcampo de Palavea, nos que participan uns 300 gandeiros en distintas quendas e uns 190 tractores, e sobre o Carrefour de Lugo.
O obxectivo dos gandeiros nas negociacións con Carrefour será lograr un acordo similar ao que xa lograron con Eroski e con Lidl: unha suba mínima de 2 céntimos que se lle deberá trasladar aos gandeiros e a aposta por potenciar a orixe galega do leite a través do Galega 100% nas súas marcas brancas.
No caso de Carrefour o punto de partida das negociacións é máis difícil debido ao compromiso da multinacional francesa de distribuír o leite e os produtos lácteos de Francia, claramente excedentaria, en mercados como o español, o que choca cos intereses dos gandeiros galegos e españois.
Unha vez que se conseguiu sentar a negociar a Carrefour, e á espera dos resultados da reunión, o seguinte obxectivo na axenda da Plataforma en Defensa do Sector Lácteo Galego é presionar a Alcampo e, sobre todo, a DIA para que tamén inicien negociacións que leven a unha subida do prezo do leite en orixe, que en Galicia está nunha media de 0,28 euros por litro, o máis baixo do Estado.
Os gandeiros do Deza irán a Lugo a apoiar o bloqueo do Carrefour
Por último, sinalar que gandeiros da comarca do Deza decidiron esta tarde desprazarse a Lugo para apoiar o bloqueo ao Carrefour da Avenida Infanta Elena. O bloqueo que mantiñan sobre o Eroski e o Lidl de Lalín xa o levantaron onte despois de que estas dúas empresas da distribución chegasen a un acordo cos gandeiros.