Galego
A Interprofesional del Vino de España acaba de publicar “Radiografía de canles de consumo de viño en España”, un estudo realizado polo Observatorio Español del Mercado del Vino (OeMv) no que se analiza o consumo de viño en España e a súa distribución por canles para o ano 2018.
En total, as vendas de viño a nivel nacional alcanzaron os 6.809 millóns de euros, cun prezo de venda ao público medio estimado en 6,75 euros o litro.
A partir da análise de diferentes fontes (datos do Ministerio de Agricultura, da consultora Nielsen…etc) o estudo conclúe que do total de consumo aparente de viño en España, estimado en 1.008,5 millóns de litros, case o 68% das vendas concéntranse en dúas canles: as compras na distribución (supermercados, hipermercados…etc), que representan o 35,4% do total, e na canle HORECA (hoteis, restaurantes e cafetarías), que supoñen o 31,4%. A terceira canle en importancia é a venda directa en adega e o autoconsumo dos residentes, que representa o 17,9% e as viñotecas e tendas gourmet supoñen o 5,8% das vendas, porcentaxe similar ao atribuído á estancia de turistas. A venda de viño a través de internet representou en 2018 soamente o 0,8%.
En termos de valor, a facturación total do sector en 2018 sitúase en 6.809,8 millóns de euros, o que implica un prezo medio do viño en España para o consumidor de 6,75 euros/l e que, pola diferenza entre os prezos medios de cada un das canles, distribúense de forma diferente a como se fai o volume.
O menor prezo corresponde á venda directa, 1,71 euros o litro, mentres que o viño adquirido na distribución para o consumo nos fogares sobe a 3,26 euros o litro. Os prezos máis elevados alcánzanse na canle HORECA (11,72 EUROS), vinotecas (13,74) e clubs de viños (13,81 euros).
