Galego
Os prezos dos produtos lácteos industriais manteñen a tendencia á alza das últimas semanas. En Europa, o leite en po sitúase en 236 euros / 100 Kg., tras unha suba do 2,3% nun mes, en tanto a manteiga cotiza a 355 euros / 100 Kg. (+2% nun mes), que é un valor historicamente alto se se atende á serie dos últimos 15 anos, máis alá dos récords acadados no 2018 e 2019.
Fóra de Europa, as cotizacións do Global Dairy Trade (GDT), a principal subasta internacional de lácteos, operada pola neozelandesa Fonterra, tamén van na boa dirección. O índice de prezos do GDT acadou na última poxa o seu maior valor desde maio do 2014, 1.170 puntos, cunha suba do 3%, o que é indicativo do bo momento de mercado.
Evolución do índice de prezo do Global Dairy Trade nos últimos 10 anos.
En Galicia, esperábase que as boas perspectivas do mercado de produtos lácteos industriais tivesen repercusión nos contratos de leite da nova campaña, pero polo de agora as ofertas que se coñecen manteñen a liña de prezos do exercicio anterior.
O bo comportamento dos prezos internacionais benefíciase do aumento das compras que está realizando China, que no 2020 mercou un 35% máis de manteiga, un 13% máis de queixo e un 38% máis de soro, reducindo só a gama de leite en po (-2% o leite desnatado en po).
Tal escenario permitiu que as granxas europeas aumentasen as súas entregas nun 1,7% de media no 2020 sen que houbese dificultades para colocar o produto. As factorías do continente produciron no último ano un 2,8% máis de manteiga, un 1,6% máis de queixo e un 3,3% máis de leite líquido, unha gama de produto que se viu beneficiada polos confinamentos, o que propiciou o aumento do seu consumo doméstico. O leite en po desnatado medrou tamén un 3,4 % e no lado contrario, descenderon categorías como a nata (-1%) e o leite condensado.
