Galego
Os novos produtos, no laboratorio do Grupo Soaga en Vilanova de Arousa
A agricultura camiña cara a unha produción máis respectuosa e sostible, coa aprobación de novas normativas cada vez máis esixentes en materia de biodiversidade e medio ambiente. Neste contexto presente e futuro cada vez máis restritivo cos fertilizantes e fitosanitarios, o Grupo Soaga adiántase co lanzamento de dous novos produtos bioestimulantes a base de microorganismos en solución: NITROFIX e LIBERPLUS.
Estas biosolucións están ideadas para reducir e substituír parcialmente os fertilizantes nitroxenados e fosfatados. Pero ademais, estes dous produtos achegan outros beneficios que van máis aló do suplimento de nutrintes, por exemplo a produción de fitohormonas que estimulan o crecemento, o enriquecemento da diversidade do chan (tan importante para manter o equilibrio da planta co medio) ou a compatibilidade de aplicación cos herbicidas.
Fertimón Tech, a nova gama de produtos de última xeración
Na súa aposta pola innovación, o Grupo Soaga saca ao mercado estes dous novos produtos de cara a esta nova tempada agrícola que está a piques de comezar como unha forma de axudar aos produtores a obter un maior rendemento e lograr unha redución dos custos.
Ambos estimulantes naturais, que forman parte da nova gama de produtos de última xeración Fertimón Tech, comparten a mesma formulación líquida con bacterias vivas e viables, sen esporas liofilizadas. Isto facilita a súa aplicación e proliferación no campo, favorecendo unha colonización máis rápida ca outros produtos similares do mercado.
Estas solucións líquidas pódense usar mesturadas coa maioría dos herbicidas do mercado, o que reduce gastos e minimiza o tempo de aplicación
Ademais, son compatibles coa maioría dos herbicidas sen que iso afecte á supervivencia das bacterias. Isto permite un aforro de custos á hora da aplicación en campo, xa que na mesma pasada de tractor ou maquinaria de pulverización utilizada pódense aplicar mesturados o herbicida e o bioestimulante.
Auxe no uso de bioestimulantes e novas solucións
Desde o Grupo Soaga recalcan a importancia exponencial que está a cobrar o uso dos bioestimulantes, os microorganismos e demais medidas alternativas aos fitosanitarios e fertilizantes tradicionais.
“Grazas a este tipo de produtos que se poden aplicar en calquera época do ano sen restricións despreocupámonos da emisión e escorrentía de contaminantes, melloramos as propiedades do chan e non danamos o medioambiente”, asegura Rafael Gago, responsable do departamento de Innovación do Grupo Soaga.
Este tipo de produtos, autorizados para agricultura ecolóxica, poden aplicarse en calquera época do ano sen restricións
Estes produtos están autorizados en agricultura ecolóxica. Con todo, dada a súa efectividade, no Grupo Soaga están seguros de que NITROFIX e LIBERPLUS serán un éxito tanto en agricultura orgánica como convencional. “A práctica irá demostrando todo o seu potencial e os seus beneficios e rompendo calquera reticencia inicial que poida xurdir á súa utilización”, conclúe Rafael Gago.
Bacterias vivas ao servizo dos cultivos
NITROFIX contén células vivas de Azospirillum brasilense, posiblemente una das bacterias fixadoras de nitróxeno atmosférico máis estudadas e estendidas en agricultura. Poden adaptarse e colonizar case todos os cultivos, xa sexa libremente na rizosfera, sobre as raíces ou dentro do tecido condutor. Onde sexa, captará nitróxeno atmosférico en forma de NHx que quedará dispoñible para a planta e segregará fitohormonas que estimulan a división celular.
As bacterias ‘Azospirillum brasilense’ reducen o uso de fertilizantes nitroxenados químicos e melloran a resistencia das plantas á seca
LIBERPLUS contén células vivas de Pseudomonas putida. O seu complexo metabolismo, amplamente estudado en enxeñería xenética, permítelle colonizar e remediar chans salinos, con pH extremos e mesmo contaminados con metais pesados. Con todo, o principal interese agronómico débese á súa capacidade de solubilizar fósforo e calcio non dispoñibles, producir sideróforos (moléculas transportadoras de ferro) e segregar auxinas, que inducen o crecemento radicular.
Doses recomendadas para cereal, froiteiras e cultivos hortícolas
O Grupo Soaga distribúe e comercializa en toda España estas dúas solucións que poden utilizarse por separado ou combinadas en multitude de cultivos, producindo sinerxias nos seus efectos positivos sobre as plantas.
En cultivos en extensivo de cereal, por exemplo millo, o plan de abonado recomenda unha dose de litro e medio por hectárea de Liberplus cando o cultivo ten entre 2 e 3 follas para impulsar o crecemento e outra dose similar de Nitrofix dúas semanas despois para achegar nitróxeno.
As bacterias solubilizadoras da especie ‘Pseudomonas putida’ están indicadas para remediar chans con bloqueos de fósforo, ferro ou calcio
No caso de froiteiras como kiwi ou berries, recoméndanse doses de 5 litros por hectárea de Liberplus ao comezo da primavera, en 1 ou 2 aplicacións, e complementar con Nitrofix un mes antes da colleita.
Para pataca e demais hortícolas, aplicar ao comezo do ciclo 5 L/ha de Liberplus e dúas semanas despois 5 L/ha de Nitrofix.
