Galego
Nunha xuntanza en San Caetano entre a conselleira do Medio Rural, María José Gómez, e a presidenta da Fundación Dieta Atlántica, Rosaura Leis, a conselleira destacou que a Xunta intensificará o seu apoio aos produtos agroalimentarios galegos con calidade diferenciada e de proximidade.
Neste encontro, no que tamén participou o director da Axencia Galega da Calidade Alimentaria, Martín Alemparte, analizáronse posibles liñas de colaboración entre a Consellería e a Fundación en ámbitos como a promoción da calidade alimentaria, a formación e a investigación, especialmente no que respecta á difusión da Dieta Atlántica.
Ambas partes coincidiron en destacar a importancia da Dieta Atlántica para un consumo saudable e variado, baseado en produtos de proximidade e de km 0. A Xunta xa está a traballar nesa liña coa incorporación destes produtos nos comedores escolares a través do programa Come Local.
Neste contexto, a conselleira destacou o Plan Saborea Calidade Diferenciada de Galicia, que conta cun orzamento de máis de 8 millóns de euros para accións directas da Consellería e achegas aos consellos reguladores para promoción e control da calidade. O plan tamén contempla a participación en feiras sectoriais a nivel nacional e internacional.
María José Gómez puxo en valor os diferentes selos de calidade que amparan os produtos agroalimentarios galegos, como as denominacións de orixe, as indicacións xeográficas protexidas e a marca Artesanía Alimentaria.
Segundo destacou, estas certificacións garanten a proximidade e a identidade atlántica dos produtos, polo que a cooperación coa Fundación Dieta Atlántica pode aportar un valor engadido ás políticas da Xunta neste eido.
Control OJD
