Acruga mantén unha primeira reunión coa conselleira do Medio Rural

A Asociación de Criadores de Rubia Galega (Acruga) mantivo unha primeira reunión coa nova conselleira do Medio Rural, Ángeles Vázquez, para informala das súas actividades. No encontro, no que participaron o presidente de Acruga, César Dorado, e a secretaria executiva, María Traba, a asociación trasladoulle á conselleira o traballo que está a desenvolver na mellora xenética da raza, cun programa que inclúe selección de vacas, de sementais e transferencia de embrións.

A liña de mellora xenética, que segundo Acruga permitiu nos últimos anos mellorar cuestións como a facilidade de parto da raza, continuará a ter o apoio da Consellería, informou Medio Rural tras a reunión.

Cabalos de pura raza galega
A directora xeral de Gandaría, Belén do Campo, mantivo pola súa parte outro encontro de traballo coa Asociación de Criadores de Cabalo de Pura Raza Galega (Puraga), á que informou da próxima creación dun banco de seme e de embrións de cabalos de raza galega. Medio Rural desenvolverá un programa de cría e testaxe de poldros no Centro de Recursos Zooxenéticos de Galicia, ubicado en Fontefiz (Coles, Ourense).