A Xunta minimiza o efecto da supresión das axudas da PAC para pastos arbustivos de menos de 0,3 hectáreas

A Consellería do Medio Rural reduce o efecto que terá en Galicia a súa decisión de suprimir este ano as axudas da PAC para as superficies de pastos arbustivos e baixo arborado de menos de 0,3 hectáreas.

Así, en primeiro lugar, e en resposta a Campo Galego, a Consellería recoñece que “é certo que na nosa Comunidade estes recintos con superficie inferior a 0,3 ha quedan fóra das axudas da PAC”.
Unha decisión motivada, segundo a Xunta, porque estas superficies “orixinaron nos últimos anos problemas importantes coa Comisión Europea en España e noutros Estados membros, polo que a UE obrigou a que se tomen medidas correctoras -a través do CAP 2015- para evitar pagos indebidos sobre estas superficies”.

Sen embargo, lembran que “a superficie total de uso pasto arbustivo e pasto arborizado declarada en Galicia en 2015 supón menos do 10% do total de superficie declarado”.

Ademais, dende o departamento que dirixe Ángeles Vázquez aseguran que “non é certo que se reducira moito a axuda por este motivo”. Así, aclaran que “esta decisión non supón ningunha redución nin penalización nos importes dos dereitos de pago básico que se asignan este ano”, pois:

– A estes recintos asígnaselles unha superficie admisible para as axudas igual a cero, polo que non computarán a efectos das mesmas.

– A redución da superficie declarada considérase unha corrección da Administración non imputable ao beneficiario, polo que non provoca penalizacións sobre o resto da superficie.

– O mesmo importe total de dereitos de pago básico por beneficiario asignarase sobre o resto da superficie da explotación, polo que recibirán o mesmo valor total de dereitos pero cun importe algo superior por dereito.

Sen embargo, Medio Rural elude entrar a valorar como afectará ao cobro de outras axudas directamente vencelladas ao mantemento da carga gandeira e polo tanto da superficie declarada.

Por último, a Consellería de Medio Rural informa de que se revisaron miles de recintos destes pastos arbustivos e baixo arborado de máis de 3.000 m2 para comprobar que hai unha predominancia de pasto herbáceo e que se mantén unha actividade agraria anual, tal e como esixe a Comisión Europea para cobrar as axudas da PAC.

O resultado en Galicia, despois de revisar 6.000 recintos, dos cales 600 tamén se inspeccionaron en campo, foi que “a correspondente análise estatística dos resultados obtidos levou a facer cero a superficie declarada neste tipo de recintos en gran parte da nosa Comunidade e noutra parte a reducir lixeiramente o CAP 2015 (nesta última parte de Galicia está o 45% da superficie destes usos declarada na nosa Comunidade)”, aseguran dende a Consellería do Medio Rural.