A Plataforma en Defensa do Sector Lácteo Galego, na que participan organizacións agrarias e representantes dos gandeiros mobilizados en Santiago , acordou hoxe á noite o bloqueo xeral de todas as industrias lácteas de Galicia. Ademais, manterán o bloqueo con tractores da sede da Xunta en San Caetano.
Esta decisión aprobada hoxe polos gandeiros en asemblea, deberá ser refrendada de novo mañá ás 12:00 horas nunha nova asemblea en Santiago de Compostela.
Os produtores lácteos manterán reunións ao longo de toda esta noite para debater esta decisión, en tanto a Plataforma xa está a traballar no plan de bloqueo das industrias. Con esta decisión o sector pretende forzar ao Ministerio de Agricultura a impulsar un compromiso de industria e distribución para a revalorización inmediata dos prezos do leite.
Por outra parte, tras 72 horas, continúa o bloqueo do centro de distribución de DIA en Mercagalicia.
En Lugo a asemblea de gandeiros chama á calma e adianta unha suba do leite a 33-36 céntimos
Pola contra, en Lugo os representantes dos gandeiros por concellos acordaron esta noite manter a tractorada pacífica ao redor da Muralla, aínda que algúns tractores se retiraron.
Nun comunicado de audio enviado aos gandeiros, os representantes da asemblea de gandeiros salientan que o portavoz, Roberto López, xunto con outros dous representantes, acudirán mañá a Santiago de Compostela para participar nunha reunión co presidente da Xunta, Alberto Núñez Feijóo, e a conselleira do Medio Rural e do Mar, Rosa Quintana. Neste encontro, ao que tamén están convocados os representantes da Plataforma en Defensa do Sector Lácteo Galego, farase unha valoración do preacordo para o sector lácteo presentado hoxe.
Como avance, o representante dos gandeiros de Lugo informa no audio de que “acaba de chamar Feijóo para convocarnos á reunión e parece que hai avances, cunha horquilla de prezos do leite de entre 33 e 36 céntimos por litro”.
Engade que “evidentemente vannos esixir máis calidade; é dicir vannos facer unhas esixencias en base ás calidades”. Ademais, pídelle aos gandeiros que “tedes que ter calma e paciencia e aguantar ata a reunión de mañá”.
Por último, o representante da asemblea de gandeiros de Lugo anúncialles aos produtores lácteos que “os de Santiago están retirando os tractores de diante das distribuidoras”. “E é moi importante ter ese dato en conta: ao revés xa o fixeron e agora estanos quitando, así que paciencia e aguantar ata mañá”, conclúe.