Galego
“A vindeira semana agardo que teñamos boas novas en relación co contrato tipo para o sector leiteiro”. Así o anunciou esta mañá a conselleira do Medio Rural, Ángeles Vázquez, tras participar en Madrid na xuntanza da Conferencia Sectorial e o Consello Consultivo de Política Agrícola.
Ángeles Vázquez engadiu que este modelo de contrato único –no que está a traballar a Interprofesional Láctea (INLAC)– permitirá “poñer as cartas boca arriba” no sector e coñecer o grao de cumprimento de cada quen na cadea de valor do leite.
A titular de Medio Rural sinalou que este documento viría sumarse ao Real Decreto de cesión de prezos que está a tramitar o Goberno Central e que demostra, segundo a conselleira, que por parte da Xunta e do Ministerio “vamos cumprindo” os compromisos co sector.
Neste contexto, a conselleira puxo en valor o plan da Xunta –xa en marcha– de Fortalecemento do sector, que foi “ben recibido” por todos os axentes do lácteo e que permitirá analizar as súas fortalezas e debilidades.
“As protestas dos gandeiros non se producen no momento adecuado”
Neste mesmo sentido, Ángeles Vázquez indicou que unha desas debilidades é a “fragmentación” do sector, que se pon de manifesto nas mobilizacións convocadas para estes días polos representantes dos gandeiros. Estas protestas, dixo, non se producen no “momento adecuado” e mesmo “poden prexudicar outros ámbitos”, en plena campaña de Nadal. A conselleira lembrou que polo de agora a “sociedade é solidaria cos gandeiros”, polo que fixo unha chamada á sensatez e á unión do sector, “polo ben de todos”.
Ángeles Vázquez reiterou a súa insatisfacción pola lenta recuperación dos prezos, pero insistiu en que “se deron pasos firmes” a prol do sector, como o demostra que “xa non existe banalización do leite, retiráronse contratos á baixa e conseguiuse frear a caída dos prezos”. E lembrou, a maiores, que por parte da Consellería “axilizamos os adiantos dos pagos da PAC, de forma que de 33.000 beneficiarios cobraron xa uns 28.000.”
