A cadea Dia denuncia ós gandeiros que bloquearon o seu centro loxístico

As dúas semanas máis fortes das protestas gandeiras, na primeira quincena de setembro, saldáronse sen que trascendesen sancións ós gandeiros por parte das forzas de seguridade. Pero si houbo denuncias de dúas das empresas afectadas polos bloqueos, a francesa Lactalis-Puleva e Dia. A cadea de supermercados tomou nota das matrículas dos tractores que bloquearon o seu centro loxístico en Santiago e está a anunciarlles ós produtores a presentación de denuncias ante o xulgado de instrucción competente para pedir indemnizacións polas perdas sufridas.

Ante tal decisión da multinacional española, Unións Agrarias vai promover un boicot entre os consumidores. A organización agraria iniciará protestas ante os establecementos Dia co fin de informar ós consumidores da “política de ameazas e denuncias xudiciais” da compañía. O calendario das mobilizacións, que partirán co lema ‘Defender ós produtores galegos non é delito’, será dado a coñecer en breve.

O sindicato trasladaralle tamén ós consumidores como as políticas de prezos de Dia afectan ás explotacións lácteas e a outros sectores gandeiros da comunidade, como o avícola, que se viu “perxudicado” cando Dia “rebentou á baixa o prezo do polo”, critica a organización.

Unións Agrarias considera que as denuncias cursadas por Lactalis e por Dia teñen como obxectivo final “desmontar o sector lácteo de Galicia”. A organización demanda que as Administracións actúen para frear esta “política de ameazas” e anuncia que pon os seus servizos xurídicos a disposición dos gandeiros afectados.