A Axencia Tributaria aumenta a fiscalidade e as sancións ás axudas de incorporación

A Axencia Tributaria considera estas axudas como unha subvención corrente e non como unha axuda de capital, o que fai que os mozos incorporados teñan que tributar ata 6.000 euros por unha axuda que rolda os 24.000. Nalgúns casos tamén hai sancións de ata 1.600 euros

Publicidade
A Axencia Tributaria aumenta a fiscalidade e as sancións ás axudas de incorporación

Os 264 mozos e mozas aos que en 2014 a Xunta de Galicia lles aprobou a axuda de incorporación á agricultura estanse a atopar estes días cunha desagradable sorpresa na Declaración da Renda. E é que a Axencia Tributaria puxo este ano especial celo nestas axudas ao consideralas como unha subvención corrente para uso individual e non como unha axuda de capital destinada a investir na modernización e posta en marcha da explotación.

Isto tradúcese en que os arredor de 20.000 euros de axuda deben incluírse íntegramente na declaración do IRPF de 2014 e computarse no ano no que se concedeu, non no que se cobrou. A efectos prácticos supón pasar dunha liquidación na que o mozo tiña que devolver 330 euros de media a ter que pagar ata 5.000 e mesmo 6.000 euros.

Afecta sobre todo aos mozos que se incorporaron a sociedades civís

Dende Arza Ingeniería, unha empresa lucense que tamén traballa como xestoría para numerosas explotacións, aseguran que “este é o primeiro ano en que Facenda se empeza a meter coas axudas de incorporación, pois aínda que as consideraba dende hai anos como unha ganancia patrimonial e non unha axuda afecta á explotación, era moi raro que aplicasen o seu criterio”.

Sen embargo, este ano aseguran que “xa levamos un caso no que lle reclamaron ata 6.000 euros a unha persoa física, coa explotación ao seu nome, pero sobre todo tiveron problemas coas incorporacións a sociedades civís, onde xa levamos tres casos”. “De nada lle valeu á Axencia Tributaria -engaden- que aportásemos certificados da Consellería de Medio Rural nos que acreditaba que a axuda non a cobraron no 2014 e de que é unha subvención para a compra de maquinaria, obras de mellora nas explotacións, capitalización da sociedade, …etc”.

Ademais, a Axencia Tributaria estalles a aplicar sancións de ata 1.600 euros por non imputar a axuda de incorporación na declaración da renda de 2014. Neste sentido, dende Arza Ingeniería explican que “a partir do 1 de xaneiro de 2015 cambiou a lei para que se declare a axuda cando se ingresa, pero non cando se aproba, pero antes desa data segue vixente a normativa anterior”. De momento os afectados recorreron as sancións pero están a pagar as liquidacións impostas por Facenda.

Unións Agrarias considérao un “absurdo” e solicita unha entrevista coa delegada da Axencia Tributaria en Galicia

Ante esta situación, o sindicato Unións Agrarias ven de enviar unha carta á delegada da Axencia Tributaria en Galicia, Imelda Capote, para pedirlle unha entrevista na que abordar o problema.

Javier Iglesias, portavoz de Gandería de UUAA, considera que “hai un erro claro de interpretación destas axudas” por parte da Axencia Tributaria. “É absurdo que se considere a axuda de incorporación como un ingreso ordinario cando se trata dunha subvención de capital destinada a investir na explotación, tal e como establece a convocatoria da Xunta”, asegura Iglesias.

A única excepción contemplaríaa cando se destina a axuda de incorporación a adquirir accións para entrar nunha sociedade (SAT, SC, SL..), “que non é un gasto amortizable, aínda que a Axencia tributaria entende que hai que declarala integramente no ano que se cobra -a partir do 1 de xaneiro de 2015- aínda que se trata dunha participación para unha serie de anos”.

Unha situación que afecta a 264 mozos en 2014 e a 146 aos que se lle aprobou a axuda en 2015

O especial celo da Axencia Tributaria en aumentar a fiscalidade para estas axudas de incorporación afecta aos 264 mozos e mozas aos que se lles aprobou en 2014. Afectará tamén aos 146 expedientes de axudas de incorporación que Medio Rural aprobou en 2015, sempre e cando cobraran a axuda nese ano. Neste 2016 hai máis de 700 solicitudes presentadas, segundo os datos facilitados a pasada semana pola Consellería.

Exemplo de sanción da Axencia Tributaria un mozo que recibiu  as axudas de incorporación:

SANCION_axudas_INCORPORACION_AET

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información