Galego
A conselleira do Medio Rural, Ángeles Vázquez, conminou hoxe de novo ás cooperativas primeiro compradoras de leite de Galicia a que se fusionen para realizar unha oferta en conxunto de leite e ter máis capacidade de negociar mellores prezos para os gandeiros coas industrias.
“As 39 cooperativas primeiro compradoras que hai en Galicia teñen que deixarse de personalismos e fusionarse de xeito inmediato nunha soa”, asegurou esta mañá a conselleira na rolda de prensa de presentación da nova campaña da PAC.
Codegui: a Xunta segue mediando entre Leite Celta e a cooperativa para atopar unha solución
Ángelez Vázquez respondía desta forma a unha pregunta sobre a cooperativa Codegui, de Guitiriz (Lugo) á que este luns Leite Celta deixou de recollerlle o leite ao vencer o contrato e non renovalo a cooperativa portuguesa.
“Non é a primeira vez que isto sucede” lembrou a conselleira ao tempo que incidiu en que a consellería está facendo unha labor de interlocución con Codegui e con Leite Celta para buscar unha solución.
Codegui empezou a enviar este luns 25.000 litros para intervención a 0,18 céntimos
Raúl Prieto, presidente de Codegui asegurou en declaracións a Campo Galego que “de momento non hai novidades e hoxe enviamos 25.000 litros para intervención en leite en pó” que lle serán pagados aos gandeiros a 0,18 céntimos mentres non se atopa unha solución mellor. Tres dos 50 gandeiros da cooperativa atoparon unha saída vendéndolle o leite a Logística Alimentaria e a Reny Picot.
Polo demáis, a conselleira do Medio Rural volveulle pedir ao Ministerio que publique canto antes o Decreto de Cesión de Prezos e a regulación da figura dos primeiros compradores. “Os gandeiros non poden seguir neste impass”, advertiu.
Igualmente, demandou que se poña en práctica o acordo para informar da orixe do leite na etiqueta e que empecen a funcionar as organizacións de produtores para poder ter máis capacidade de negociación do prezo do leite coas industrias.
