Galego
Os estudos desenvolvidos por MAS Seeds en silos de millo, a partir da súa rede europea de I+D, revelaron as dificultades de colleitar o millo para silo no seu momento óptimo. Para paliar o problema, a firma de sementes desenvolveu as variedades Green+.
Colleitar o millo entre o 32 e o 35% de materia seca (MS) proporciona un bo compromiso entre rendemento, valor alimentario e conservación, pero as análises de silo desenvolvidas por MAS Seeds no 2017 e 2018 mostraron que só 1 de cada 3 gandeiros conseguen colleitar con esa porcentaxe de materia seca.
Os problemas derivados desa situación son variados. Colleitar moi cedo limita o rendemento e o valor enerxético do ensilado. Doutra banda, unha colleita tardía leva consigo un aumento de rendemento de MS/ ha pero tamén un cambio na composición química do millo: o nivel de almidón aumenta, pero ao mesmo tempo diminúen os azucres solubles, a dixestibilidade das fibras e o nivel de proteína. Ademais, a compactación do silo e a conservación son máis difíciles porque o ensilado está máis seco.
Como responden as variedades Green+ a este reto?
Os híbridos Green+ caracterízanse polo seu eficiente ‘stay-green’, é dicir, pola súa maior permanencia nunha etapa óptima para o ensilado. Son capaces de manter unha alta capacidade de fotosíntese e incrementar o rendemento até estadíos de madurez adecuados para o uso forraxeiro (entre 32 e 35% MS da planta enteira), mesmo en condicións cálidas e secas.
A nivel morfolóxico, esta evolución máis lenta da materia seca permite manter follas e talo verdes, con gran pastoso, e ampliar o prazo de colleita de 5 a 10 días, dependendo das condicións meteorolóxicas.
Os híbridos Green+ achéganlle máis flexibilidade aos gandeiros para colleitar o millo ensilado na fase adecuada.
Máis información
Control OJD
